阿梅95年明報周刊訪問
(感謝FansTeresa提供以下資料)
題目：劉培基：君子好逑，無可厚非
十年看梅長 憐她屢受傷
劉培基是梅艷芳的摯友，今次又為梅艷芳設計演唱會的舞衣。
兩人合作十年，劉培基對阿梅的心事，當然知得清楚。
本刊記者欲知女兒心事，當要向劉培基了解了解。
『我自己點睇佢哋兩個相處？唔
…… 順其自然喇！隨緣喇！有無機會？人人都希望阿梅好嘅。』
他以拍擋、好友身分從旁觀察,趙梅可有拍拖跡象？
『呢個階段，話係與唔係都武斷了些，的覺得他們蠻投契，合得來，不過，就算有，都係一個月之內嘅事！我哋埋班都係一個月左右。趙文卓幫梅艷芳做運動嘛。』
他說沒有和趙文卓相處過，連話也說不上幾句，言及印象，劉培基暫難有深切感受。
『不過，如果以二十一歲年齡計,我覺得他的處事手法不止二十一歲。
佢處事好成熟！』
『我照件事分析咋！好似件新聞出咗咁！so far 佢無亂講嘢。口頭上，他沒有講明是與不是，行動上，卻從不閃縮，態度大方得體。我都幾欣賞他的大方表現㗎！起碼無壞先。』
兩個人相處的情景，劉培基當然見過：『他們的舉動，未能令我覺得是在熱戀階段，因為藝人性格有共通點，如果佢越緊張，戀情就會越保密，我覺佢哋相處好大方，無過分，無眉來眼去，我知道他們是好朋友囖。』
劉培基可知道兩個人如何認識？
『是在一個派對認識的，張國榮介紹㗎！開頭是傾普通嘢，但一講到武術就好投契，趙文卓好識得點練肌肉，他是這一門的專家，阿梅今次得佢幫助，全身肌肉練得好fit。』
在後台，劉培基見過趙文卓push 梅艷芳：『努力呀！』阿梅好感動。做騷時在前後台穿梭走動，冷氣熱氣輪流吹，阿梅已經覺得有點傷風，但依然保持表演狀態。
對於這段情，劉培基睇唔睇好？有沒有發展機會？
『提到佢，阿梅幾開心㗎！』
如果以男朋友、好朋友與朋友三個陌段分類，目前他們在哪一個階段上？
『如今是……唉……你咁問……』劉培基自覺『責任』重大，頓時想到頭爆：『只能講，To be fair，這件事……他倆是朋友，不過有可能成為男女朋友。因為……唔……大家投契，講開運動，興致勃勃，唔……，幾多鼓勵呀，唔理是男友還是教練，
有人push 自己都是好凡嘅！』
問劉培基，他可覺得趙文卓有追求梅艷芳的行動？
『覺唔覺得呀……，佢真係關心阿梅，否則唔會咁緊張佢，如果無追求意思，又唔會咁關懷，總之，君子好逑……，無可厚非唧！』
十年相處，劉培基對梅艷芳的關心，由心講到出口。
『由八五年幫佢，到今日，睇住佢成熟，好似睇住一棵樹長大咁激動。梅艷芳再上紅館，我唔幫佢，唔過意得去，我係忟佢唔愛惜自己。佢成日在人前扮堅強，但一個人獨處是唔知幾寂寞呀！』
劉培基每晚在化妝間幫阿梅，看到她處身在大群人中，寂寞的神情依然在眉宇間流露，更加憐惜這個飽受生活折磨，受盡情傷的女人。
『我祝福佢早日找到個疼她的人，不至於每晚回家，看着幾堵牆……，唉……，這種感覺，這種滋味我深有體會。』
趙文卓比梅艷芳小十年…….
『絕對唔重要喎！』雖然梅艷芳與趙文卓在不同地方長，又在不同的背景下尋生活，但是，劉培基卻認為這種環境，反而更適合培養這段情。
『成日見唔係幾好，分開可以讓雙方放心工作，這樣對梅艷芳會好一點。她以往太易投入一後段感情，熱得快，好容易受傷，如今工作迫他們分開，慢慢發展，雙方有時間了解透徹些，他是有機會成為梅艷芳男友㗎！我一向贊成男女拍拖，女方年齡比男方大。女人大過男人幾年沒什麼不好，現代男人找對象，都想找個有安全感的伴，找個比自己年紀小的，可能受盡折磨，男人也需要伴兒有母性、有愛，這才是體貼。對心理生理都好，女人比男人大一點，絕對是好事。』
，，，，，~完~
